“Zibili maşından atmaq olmaz” dedi və... döyüldü

Jurnalist sürücü tərəfindən döyülüb. Cars-az “qafqazinfo”-ya istinadən xəbər verir ki, bu barədə urban.az saytının əməkdaşı olan jurnalist Səbinə Quliyeva özünün facebook hesabında məlumat verib. Onun sözlərinə görə, dünən avtomobilindən içki qutusunu atan sürücüyə “zibili maşından atmaq olmaz” deyə nəzakətlə etirazını bildirib. Cavabında isə sürücü onu təhqir edib və jurnalistdən avtomobilini saxlamasını tələb edib.

S.Quliyeva bildirib ki, maşınını saxlayanda həmin sürücü onun üzünə zərbələr endirməyə başlayıb. Polislə hədələdikdən sonra isə həmin şəxs maşını jurnalistin ayağının üzərindən sürərək oradan uzaqlaşıb.

S.Quliyeva artıq ərizə ilə polisə müraciət etdiyini və bu günə ekspertiza təyin edildiyini bildirib.