Dəhşətli qatar qəzasının səbəbkarı bilindi

Almaniyada 10 nəfərin həyatına son qoyan dəhşətli qatar qəzasına kimin səbəb olduğu məlum olub. Məlumata görə, dispetçer gecikən qatarı qırmızı işıqda irəli buraxmaq üçün avtomatik siqnalizasiyanı söndürüb. Lakin qatar yol qovşağını təyin olunmuş müddətdə keçə bilməyib və toqquşma qaçılmaz olub. Almaniyada ötən gün baş vermiş dəhşətli qatar qəzasına dispetçerin səhvi səbəb olub. Bavariya əyalət prokurorluğunun məlumatına görə, dispetçer gecikən qatarı qırmızı işıqda irəli buraxmaq üçün avtomatik siqnalizasiyanı söndürüb. Lakin qatar yol qovşağını təyin olunmuş müddətdə keçə bilməyib. Həmin vaxt qarşıdan gələn digər qatar üçün yaşıl işıq yanıb. Bu da yüksək sürətlə hərəkətdə olan iki qatarın toqquşması ilə nəticələnib. Hadisə ilə bağlı istintaq tədbirləri davam edir.

Dəhşətli qəza nəticəsində ölənlərin sayı isə artıq 10-a çatıb. Səhiyyə nazirliyinin məlumatına görə, 100-dən artıq insan da müxtəlif dərəcəli xəsarətlər alıb.

Xatırladaq ki, insident Bavariyanın Bad-Ayblinq şəhəri yaxınlığında ötən gün səhər saatlarında baş verib. Hadisənin çətin keçilən ərazidə qeydə alınması xilasetmə əməliyyatlarını çətinləşdirib.